Mu ijoro ryo kuri uyu wa Kabiri nibwo umubiri wa Senateri Bishagara Kagoyire Thérèse wagejejwe mu Rwanda uvanywe muri Leta Zunze Ubumwe za Amerika aho yaguye.

Senateri Bishagara yitabye Imana ku wa Mbere w’icyumweru gishize mu bitaro bya John Hopkins biri muri Baltimore mu Mujyi wa Maryland muri Leta Zunze Ubumwe za Amerika aho yivurizaga.

Urupfu rwe rwatangajwe na Perezida wa Sena, Bernard Makuza, mu itangazo yasohoye mu izina ry’Inteko Ishinga Amategeko by’umwihariko Umutwe wa Sena.

Perezida wa Sena, Makuza Bernard, aherutse kubwira IGIHE ko gahunda yo gushyingura nyakwigendera ifite ibice bibiri, kimwe kiba ari icy’umuryango n’abavandimwe nk’uko bisanzwe mu muco nyarwanda ariko hari n’imihango ibera muri Sena yo kugira ngo asezerweho mu mirimo yari ashinzwe mu buryo bwemewe.

Yagize ati “Birumvikana bagenzi be baba bahari n’abo mu mutwe w’abadepite ariko batari bose, haba kandi hari n’inzego zimwe zitandukanye tuba dukorana, inzego aba yarakozemo zindi ariko n’abo mu muryango birumvikana baba bahari ariko nabo baba baragenwe.”

Senateri Kagoyire azashyingurwa mu irimbi rya Rusororo riherereye mu Karere ka Gasabo.

Senateri Makuza yabwiye yalomeje atangaza ko Sena y’u Rwanda ibuze umuntu wakundaga umurimo, ufite ubwitonzi n’ubushishozi ndetse akaba yari n’umubyeyi wabaye mu mirimo itandukanye y’igihugu.

Yagize ati “Twamwemeraga bijyanye n’ubuhanga bwamurangaga cyane ubwitonzi n’ubushishozi. Twakundaga kumwita Mama Tereza, bifite icyo bisobanuye. Yari afite umutima w’umubyeyi, umutima wuzuye urukundo ku buryo n’urupfu rubaye yari amaze iminsi arwaye ariko ntitwabonaga ko byagera aho yatabaruka cyane ko yari yagiye kwivuza hanze, na hano yari yivuje ariko ashaka no kujya kugerageza ahandi.”

Written by Nelson Mucyo

LEAVE A REPLY

Please enter your comment!
Please enter your name here